У свеце шмат цудоўных моў. Адны з іх вабяць сваёй прыгажосцю і непаўторнасцю, другія – мілагучнасцю. Але ў кожнага чалавека ёсць толькі адна мова, якая завецца роднай. Менавіта на гэтай мове ён размаўляе з роднымі, сябрамі, знаёмымі. І вельмі нядобра, калі чалавек пачынае забываць сваю мову, не шануе яе. Мова жывая, пакуль на ёй гавораць.
Родная мова шмат не патрабуе. Але калі ўжо назваў яе роднай, калі лічыш яе такой для сябе – павінен быць перад ёй і абавязак.
Мая родная мова, жыві і квітней!
Гэтыя словы гучалі асабліва часта з вуснаў настаўнікаў і вучняў падчас правядзення Тыдня роднай мовы “Як ты дорага мне, мая родная мова!” ў дзяржаўнай установе адукацыі “Сярэдняя школа 2 г.Масты”, які праходзіў з 19 па 23 верасня 2023 года. Гэта было сапраўднае свята, якое дало магчымасць кожнаму задумацца пра лёс і будучыню мовы, якую мы завём нацыянальнай і матчынай. На працягу ўсяго Тыдня праводзіліся цікавыя мерапрыемствы, якія пакінулі след у душы кожнага вучня.
План мерапрыемстваў Тыдня роднай мовы “Як ты дорага мне, мая родная мова!”
19 верасня
Акцыя "Размаўляй са мной па-беларуску"
У VI, X класах прайшла прэзентацыя віншавальных паштовак "Пажаданні роднай мове". З цікавасцю, творчым запалам і натхненнем усе вучні уключыліся ў іх падрыхтоўку. У афармленні паштовак пераважалі нацыянальныя матывы, былі задзейнічаны цікавыя, на погляд вучняў, беларускія словы. А ў пажаданнях - спадзяванні на росквіт роднай мовы, словы ўдзячнасці продкам, якія змаглі захаваць і перадаць нам гэты цудоўны скарб.
Вучні 4 "В" беларускамоўнага класа прынялі ўдзел у стварэнні інтэрактыўнага воблака слоў "Маё любімае слова па-беларуску"
Для вучняў 7 "В" класа праведзена тэматычная экскурсія "Аб родным краі роднай мовай"у школьным музеі
20 верасня
Вучні IX класаў падзяліліся рэцэптамі традыцыйных беларускіх страў, прыняўшы ўдзел у гастранамічным фэсце "Беларуская кухня"
Вучні VII класа прынялі ўдзел у стварэнні інтэрактыўнага воблака слоў "Маё любімае слова па-беларуску"
Удзел у квэст-гульні "Фальклор, фальклор - душа народа" прынялі вучні Х класаў
21 верасня
Багата, родная ты мова,
Цябе стварыў і ўзнёс народ.
А вобразы якія ў словах,
А параўнанняў што за ўзлёт!
Пятрусь Броўка
Вучні VIII-ых класаў наведалі выставу ў школьнай бібліятэцы "Сэрцам роднага слова краніся"
У XI класах прайшоў конкурс сачыненняў "За што я люблю радную зямлю". Пераможцамі сталі вучні XI "А" класа Шчаржэня Надзея, Лойка Ульяна, Чарняк Міхаіл, Мацюк Ксенія, работы якіх вызначаюцца сталай грамадзянскай пазіцыяй, шчырасцю і яскравасцю ў выражэнні сваіх пачуццяў да роднай Беларусі
22 верасня
Вучні 5 "А" класа прынялі ўдзел у флаер-фэсце "Мой родны кут, як ты мне мілы!"
Акцыя "Чытаем вершы пра родную мову"
Ніякае багацце людзей не бывае даражэйшым
за іх родную мову.
Якуб Колас
Дыстанцыйная акцыя дала магчымасць чытачам і слухачам адчуць чароўнасць і непаўторнасць роднага слова. Лепшая работа (відэаролік з выразным чытаннем верша Петруся Броўкі “Родныя словы” вучаніцай VI “Б” класа Радзікевіч Ганнай) была даслана на адрас Нацыянальнага інстытута адукацыі для ўдзелу ў рэспубліканскай дыстанцыйнай акцыі.
У школьнай бібліятэцы была арганізавана тэматычная выстава “Сэрцам роднага слова краніся”, якую наведвалі вучні нашай школы на працягу тыдня.
Вучні IX-х і X-х класаў далі старт акцыі “Чытаем Максіма Танка разам”.
Спадзяёмся, што ўсе мерапрыемствы, якія былі арганізаваны ў рамках свята, спрыялі развіццю пазнавальнай актыўнасці вучняў, узбагачэнню іх слоўнікавага запасу, а таксама садзейнічалі прывіццю любові да роднай мовы – жывой і непаўторнай, “з легендаў і казак” сатканай, “вобразнай, вольнай, пявучай”.
